Ikaw Lang Ang Mamahalin

Nakangiting naglalakad si Stephanie papasok ng kanilang eskuwelahan.Maganda ang gising niya nang araw na 'yon dahil umuwi na ang papa niya galing ng Amerika. Dalawang buwan din itong namalagi doon dahil binantayan nito ang Lola niya na may Cancer. Mabuti na lang at tagumpay ang isinagawang operasyon sa Lola niya at ngayon ay nagpapahinga na lang daw ito kasama ng kapatid ng kanyang ama na si Tito Ren. Ang sabi ng papa niya ay kapag na-maintain daw niya ang mga grado niya sa taong 'yon ay papayagan daw siya nitong bisitahin ang Lola niya sa Amerika. Kaya naman naexcite siya sa isiping muli siyang makakatapak sa bansa kung saan siya ipinanganak.Tamang-tamang pag-liko niya papunta sa kanyang classroom ay may nabunggo siyang kung sino. Napaurong siya dahil sa lakas ng impact ng pagkakabunggo nila. Mabuti na lamang at mukhang gentleman ang kung sinumang nabunggo niya at bago pa man siya mawalan ng balanse ay nahawakan na siya nito sa mga braso. Wrong move. Dahil sa sandaling lumapat ang mga kamay nito sa kanyang balat ay parang may kuryenteng nanulay mula dito papunta sa kanya kaya bahagya siyang napahakbang paatras dito.