Úr fjötrum : íslenskar konur og erlendur her

Sviku íslenskar konur land og þjóð á stríðsárunum eða leysti hernámið þær úr aldagömlum fjötrum?Hlutur kvenna hefur löngum verið rýr í íslenskri sagnfræði enda karlar þar jafnan haldið á penna. Einna helst hafa konur komið við sögu þegar kemur að frásögnum af "ástandsmálunum" svonefndu á árum heimstyrjaldarinnar síðari. Þá var þeim borin taumlaus léttúð á brýn og jafnvel landráð. En hvernig horfði þetta við konunum sjálfum?Herdís Helgadóttir mannfræðingur var að verða ellefu ára þegar Bretar hernámu Íslands og man því glöggt "blessað stríðið". Hún beitir bæði barnsminni sínu og auga fræðimannsins með sannfærandi hætti og fléttar saman hefðbundna fræðilega samantekt, eigin minningar frá stríðsárunum og frásagnir fjölmargra kvenna sem lifðu þetta mikla umbrotaskeið. Niðurstaðan er nýstárleg og heillandi svipmynd af þjóðinni á tímum mikilla breytinga. Úr fjötrum er einstæð saga um kjör íslenskra kvenna og þær breytingar sem urðu á stöðu þeirra þegar erlendur her tók sér bólfestu í landinu.